Uhoraho Imana yacu s’umukristo, na Yesu Kristo ubwiwe, s’umukristo.
Muvy’ukuri, ubukristo bwatangiriye i Antiyokiya, biturutse ku murimo w’intumwa Pawulo.
Imbere ya Antiyokiya, abantu bizera Yesu ntibitwa abakristo, babita abizera canke abigishwa.
« …muri Antiyokiya ni ho abigishwa batanguriye kwitwa Abakristo. »(Ivyakozwe n’Intumwa 11:26)
None idini ry’Imana ni irihe?
Imana yacu nta dini igira.
Ariko, n’aho Imana yacu itagira idini, ni URUKUNDO.
Ni kubw’URUKUNDO yaremye umuntu.
Kandi inkuru yayo n’umuntu n’inkuru y’URUKUNDO.
Muvy’ukuri, kuva umuntu agwa mu caha, bityo akitandukanya n’Imana, Imana yo ntiyamuhevye.
Imana yaradukurikiranye mu buzima bwacu kugira ngo idukize ikibazo c’icaha tutashobora kwigobotora “Kuko yagabiye kera ko duheshwa na Yesu Kristo gucika abana bayo kubgayo, nk’uko yabigomvye bikayihimbara.”(Abanyefeso 1:5)
Biturutse ku RUKUNDO, Imana yacu ishobora vyose, iciye mu mubiri wa Yesu Kristo, yapfiriye mu kibanza cacu, kugirango twebge tubone ubuzima.
N’aho Imana yacu itari umukristo, ubukristo bwo buturuka ku Mana kuko umukristo nyawe amenyekanira ku RUKUNDO.
Yesu Kristo arabitubwira neza:
“Ni mwagiriranira urukundo, ni ho bose bazomenya ko mur’abigishwa banje.”(Yohana 13:35)
Nimba rero uburyo bwacu bwo kubaho butari URUKUNDO, ubukristo bwacu n’ubw’ubusa, kandi natwe ntituri ab’Imana.
« Udakundana, ntazi Imana, kukw Imana ar’ urukundo. »(1 Yohana 4:8)
IGISABISHO:
Uhoraho Mwami Mana yacu, duhe kumenya ko udukunda kandi udushoboze gukunda nk’uko udukunda.
Ni mw’izina ridasanzwe ry’umwana wawe Yesu Kristo tubisavye, Amen.
Intumwa y’Imana Jean-Claude SINDAYIGAYA