“Ntugashingure imbago za kera,Izo ba sogokuruza bashinze.”(Imigani 22:28)
“Ntugashingure imbago zerekana imbibi za kera,Kandi ntukarengēre mu mirima y’impfubyi, Kuko Umurengezi wabo akomeye,Azakuburanya ababuranira.”(Imigani 23:10-11)
Mu bwenge bwa Data wo mu ijuru, buri kintu gifite imbibi.
Inyanja ifite inkombe, ibihugu bifite imipaka, imiryango ifite umurage, kandi buri muntu afite umugabane we.
Izo mbibi si inzitizi, ahubwo ni uburinzi bw’Imana kugira ngo abantu batibeshya mu butunzi n’ubutungane.
Iyo Bibiliya ivuga iti “Ntugashingure imbago za kera,” ni ukutwigisha kubaha ibyashinzwe n’Imana.
Muri byinshi mu bihugu bikiri mu nzira y’amajyambere, inkiko zicamo imanza nyinshi zishingiye ku makimbirane y’ubutaka. Abantu bimura imbibi kugira ngo bongere ubutaka bwabo, bakarenganya abakene, abapfakazi n’imfubyi.
Ariko ibyo bigaragaza umutima wifuza cyane kandi udafite ubwoba bw’Imana.
Uwimura imbibi y’abandi yibagirwa ko:
“Umucunguzi wabo ari Imana ubwayo, kandi izabarenganura.”
Ashobora gucika ubutabera bw’abantu, ariko ntashobora guhunga ubutabera bw’Imana.
Imana ubwayo ihagurukira kurengera abarenganyijwe.
Uwukoresha ububasha cyangwa amafaranga ngo arye iby’abandi, aba ari kurwanya Imana ubwayo.
Gushingura imbago si ugukuraho imbago gusa, ni no gukuraho umugisha wawe; kuko Imana irwanya abibona, ariko igaha ubuntu abicisha bugufi (Yakobo 4:6).
Hari n’imbibi z’umwuka n’imico myiza Imana yashyizeho:
Ukuri,
Ubudacogora,
Ubutabera,
Ubwera,
no Kubaha abandi.
Abenshi mu gushaka ubutunzi cyangwa icyubahiro barazirengaho, ariko Imana iravuga iti:
“Ntugashingure imbago nashyizeho, kuko ariho umutekano wawe uri.”
ISENGESHO:
Mana y’ubutabera,
Uri Imana irengera abakene n’abarenganyijwe, kandi urinda umurage wawe.
Tubabarire kuko twimuriye kure imbago z’ukuri n’ubutungane.
Duhindure imitima, dusubizemo ubwoba n’icyubahiro cyawe,
utwigishe kwishimira umugabane waduhaye, no kuburanira abambuwe n’abo isi yibagiwe.
Mwuka wawe adufashe kubaka igihugu cyubakiye ku kuri n’ubudahemuka, kandi ntituzigere twimura imbibi zawe.
Mu Izina rya Yesu Kristo,
Amen.
Intumwa Dr. Jean-Claude SINDAYIGAYA
Umutangabuhamya w’ubuntu bugarura ubuzima