Muri Bibiliya, imvura isigura ibintu vyinshi bitandukanye:
Iyo iguye neza ikavomera imirima, imvura muri Bibiliya bavuga ko ari imigisha canke ivyiza bivuye ku Mana.
« Uhoraho azobugururira ijuru, ari ryo bubiko bgiwe buninahaye, ngw ahe igihugu canyu imvura mu gihe cayo, ahezagire n’ibikorwa vyanyu vyose; amahanga menshi azoza kubagurana, ariko mweho ntimuzoja kuyagurana. »(Gusubira mu vyagezwe 28:12)
Iyo ari nyinshi kandi ikagwa yonona imirima n’ibintu, iyo mvura bavuga ko ari uburake bg’Imana, ibihano, canke ibigeragezo.
« Imvura imara imisi mirongwine igwa kw isi umurango n’ijoro. »(Itanguriro 7:12)
Yamara Bibiliya itwigisha ko imigisha n’ukugira neza vy’ Imana bihoraho, ariko uburake bg’Imana n’ibigeragezo ari ivy’igihe gito.
Imirongo ikurikira iremeza ko imigisha n’ukugira neza vy’Imana bihoraho:
« N’ukuri ivyiza n’imbabazi bizonyomako imisi yose y’ukubaho kwanje, Nanje nzoba mu ngoro y’Uhoraho ibihe vyose. »(Zaburi 23:6)
« Kukw imisozi izovaho, n’uturambi tuzokurwaho, arik’ ubuntu bganje ntibuzokuvako, kandi n’isezerano ry’amahoro nagusezeraniye ntirizokurwaho, ni jewe Uhoraho nkugirira ikigongwe mbivuze. »(Yesaya 54:10)
« N’ukw imbabazi z’Uhoraho ari zo zatumye tudaherengetezwa, kukw ikigongwe ciwe kidahera: Cama ari gisha uko bukeye; ingen’ ar’ umwizigirwa biratangaje. »(Gucura intimba 3:22-23)
Imirongo ikurikira nayo iremeza ko ibigeragezo n’uburake bg’Imana bimara umwanya muto:
« Kuk’ uburake bgiwe ar’ ubg’ akanya isase, Arik’ ubuntu bgiwe bgamah’ igihe cose umuntu akiriho. Ukurira kworarira umuntu mw ijoro, Ariko mu gitondo impundu zikavuga. »(Zaburi 30:5)
« Mbaye ndagutaye akanya gato, ariko nzokwiyegereza ngufitiye imbabazi nyinshi. Uburake bgaraziririnze, nguhisha inyonga zanje akanya gato, ariko nzokugirira imbabazi z’urukundo rutazoshira, ni jewe Uhoraho Umucunguzi wawe mbivuze. »(Yesaya 54: 7-8)
« Kukw amarushwa yacu ahwahutse y’akanya ka none yiyongeranije cane kudushikiriza ubgiza buremereye bg’ibihe bidashira. »(2 Ab’i Korinto 4:17)
« Ntazokwama ahana, Ntahorana uburake imisi yose. Ntiyatugiriye ibihwanye n’ivyaha vyacu, Ntiyadushubirije mu nkoko ibihwanye n’ibigabitanyo vyacu. »(Zaburi 103:9-10)
« N’iyihe Mana ihwanye nawe, iharira ibigabitanyo, ikirengagiza igicumuro c’amasigarira y’abo yiziziye? Ntuhorana uburake imisi yose, kuk’ uhimbarwa no kugira imbabazi. »(Mika 7:18)
Ijambo ry’Imana rero rifise ubutumwa bw’umwizero ko ibigeragezo vyose, n’aho vyoba bigoye gute canke bikomeye gute, impera n’imperuka biruhira guhera tugasubira mu buzima busanzwe.
Muyandi majambo, mu bihe vy’amakuba, dukwiriye kuguma twizeye Imana yacu, kuko izuba rihora risubira kwaka iyo imvura ihise.
IGISABISHO:
Uhoraho Mwami Imana yacu, dushoboze guhora tukwizera mu gihe c’ibibazo.
Ni mw’izina ridasanzwe ry’Umwana wawe Yesu Kristo tubisavye, Amen.
Apôtre Jean-Claude SINDAYIGAYA