« (Kandi uwo muntu, amaze kugura isambu ku byo yahawe ho igihembo cyo gukiranirwa kwe, agwa yubamye araturika, amara ye yose arataraka. Bimenyekana mu batuye i Yerusalemu bose, ni cyo cyatumye iyo sambu mu rurimi rwabo bayita Akeludama, risobanurwa ngo “Isambu y’amaraso.”) Ndetse byanditswe mu gitabo cya Zaburi ngo‘Iwe hasigare ubusa,Kandi he kugira undi uhaba.’Kandi ngo‘Ubusonga bwe bugabane undi.’ »(Ibyakozwe n’Intumwa 1:18–20)
Hari ahantu haba ubuhamya hacecetse bw’ibyago by’abantu.
Isambu y’amaraso ivugwa mu Byakozwe n’Intumwa ni hamwe muri ho.
Ni isambu yaguzwe n’amafaranga y’ubugambanyi — ayo mafaranga mirongo itatu ya feza niyo Yuda Isikariyoti yakiriye ngo agambanire Umwami w’ubugingo.
Iyo sambu yitwa Akeldama izwi nk’ahantu h’isoni n’amahano.
Iratwibutsa igiciro cy’ubugambanyi n’ingaruka z’ibyaha.
Amafaranga y’icyaha ntazana amahoro cyangwa ibyishimo; azana urupfu gusa.
Yuda yagerageje gusubiza ayo mafaranga, ariko umutimanama we wari wamuciriye urubanza.
Iyo sambu yahindutse ikimenyetso cy’ibisigazwa by’icyaha — ubusa, agahinda n’urupfu.
Kandi koko, Ijambo ry’Imana riravuga ngo:
“Kuko ibihembo by’ibyaha ari urupfu.” (Abaroma 6:23)
Nyamara inyuma y’ayo mahano hari ukuri gukomeye: Ijambo ry’Imana risohoza buri jambo ryaryo.
Nta kugambanirwa, nta kwicwa bishobora kuburizamo imigambi y’Imana.
Yuda yaraguye, ariko Imana yakomeje umurimo wayo — kandi undi asimbura umwanya we.
Iyi sambu y’amaraso itwigisha byinshi.
Ituburira kutagurisha kwizera kwacu ngo tubone iby’isi bihita.
Itwereka ko icyo twunguka mu cyaha kituzanira icyorezo.
Ariko hari iyindi sambu — Golgota, aho amaraso y’umuziranenge yasutswe.
Amaraso ya Yuda yavugaga gucirwaho iteka,
ariko amaraso ya Yesu avuga imbabazi n’agakiza.
Isambu ya Yuda yabaye iy’urupfu,ariko iya Yesu yabaye iy’ubugingo.
Ni kuyihe sambu uri kwubaka ubuzima bwawe uyu munsi?
ISENGESHO:
Mwami Yesu,
Ndinda kugurisha ukwizera kwanjye ku by’isi bihita.
Mpa umutima w’ukuri imbere yawe.
Aho icyaha cyanditse amateka y’agahinda, amaraso yawe ahavugire imbabazi.
Hindura umurima w’isoni mu murima w’ubuntu, Amina.
Intumwa Dr Jean-Claude SINDAYIGAYA
Umutangabuhamya w’ubuntu bugarura ubugingo.