Muri iki gihe, ijambo “mbabarira” ryaroroheye cane, rihinduka iryo kuvuga ningoga, kandi kenshi rikavugwa nk’uko ari ibisanzwe.
Umuntu akugonze — mbabarira.
Akwononeye impuzu — mbabarira. Yibagiye ico yari yemeye gukora — mbabarira.
Iryo jambo riva mu kanwa bitagoranye, nk’uko rishobora guca rifuta ivyabaye.
Ariko hari ibihe aho iri jambo riba rito cane ugereranije n’ingaruka z’ivyakozwe.
Ijambo rimwe rishobora gukomeretsa umutima.
Ingeso imwe ishobora kumena umutima w’umuntu.
Igikorwa kimwe gishobora gusiga igikomere gikomeye.
Hari ikibazo twokwibaza: mbega “mbabarira” gusa irashobora gusana ivyatabaguwe mu mutima?
Ku Mana, imbabazi ntizitangurira ku majambo y’akanwa, zitangurira ku mutima.
Bibiliya ivuga iti:
“Upfukapfuka ibigabitanyo vyiwe ntazoronka umugisha,
Arik’ uvyihana akabireka azogirirwa ikigongwe”(Imigani 28:13).
Kuvuga mbabarira utavuze neza ico wakoze ni ukwikingira. Kuvuga mbabarira udashaka guhinduka ni ukwitegura gusubira kubikora.
Imbabazi z’ukuri ntizishaka gusa guhosha ikibazo; zishaka guhindura uwakoze nabi.
Igihe Dawidi yacumura, ntiyavuze ijambo rimwe gusa. Umutima wiwe waravunitse imbere y’Imana. Yarasenze ati:
“Unkomorere umunezero w’agakiza kawe; Unshigikirishe umutima ushize icira”(Zaburi 51:12).
Uku ni ko kwihana kw’ukuri kumera: kwemera icaha, kumva ububabare wateye uwundi, kwifuza guhinduka, no kugerageza gusana aho bishoboka.
Imbabazi nyazo zitangurira imbere mu mutima mbere yo kugaragara inyuma.
Uyu munsi hari ibikomere vyinshi bitaboneka n’amaso, ariko n’ivy’ukuri. Imitima irakomereka kubera amajambo akomeretsa, agasuzuguro, akarenganyo, n’amasezerano atubahirijwe.
Rimwe na rimwe twibaza ko vyose vyakemutse kuko twavuze ijambo rimwe gusa. Ariko Yesu atwereka inzira irushijeho kuba ndende, aho agira ati:
“ubanze ugende wikiranure na mugenzawe”(Matayo 5:24).
Ku Mana, kwiyunga si umugenzo gusa; ni urugendo rwo gusubiza hamwe umubano wangiritse.
N’Imana ubwayo ntiyatubabariye ikoresheje ijambo rimwe gusa. Icaha c’abantu nticafashwe nk’ikintu coroshe. Imbabazi zatanze igiciro kinini cane.
“Kuk’ urukundo Imana yakunze abari mw isi ari rwo rwatumye itanga Umwana wayo w’ikinege, ng’ umwizera wese ntaz’ apfe rubi, arikw ahabge ubugingo budashira”(Yohana 3:16).
Umusaraba utwereka ukuri gukomeye: imbabazi z’ukuri zigira igiciro.
Zisaba umutima.
Zisaba gutanga.
Zizana ihinduka.
Ni co gituma kuvuga “mbabarira” bishobora kuba intango, ariko ntibibe iherezo.
Imana iduhamagarira kwihana kw’ukuri, kugira umutima wicisha bugufi, guhindura ingeso, no kugira ubushake bwo gusana aho twononye.
Imbabazi si ijambo rivugwa kugira umutimanama utuze; ni inzira igamije gusubiza mu buryo ivyangiritse.
IGISABISHO:
Mwami, ndinda gutesha agaciro ibikomere ntera abandi.
Mpa umutima wicisha bugufi kandi wumva, ushobora kwemera amakosa yanje, gusaba imbabazi z’ukuri no guhinduka koko. Mfasha gusana aho nakomerekeje abandi, nk’uko nanje wansubije ku murongo ku bw’ubuntu bwawe. Amen.
Intumwa Dr Jean-Claude SINDAYIGAYA