Umusi wa Mungu usigur’iki kuri wewe?
Kuri bamwe, Kuwa Mungu n’umunsi w’ikiruhuko.
Bibiliya ivuga ko n’Imana yaruhutse ku munsi w’indwi:
« Ku musi ugira indwi Imana inonosora ibikorwa vyayo yakoze; iruhuka ku musi ugira indwi ibikorwa vyayo vyose yakoze… »
(Itanguriro 2:2-3)
Ku bakristo, umunsi wo kuwa Mungu ufise insiguro idasanzwe: N’umunsi w’Imana, kuko n’umunsi wo gutsinda kw’Umwami wacu Yesu Kristo, « Dies Dominicus » mu kilatini.
Nk’uko ku musi ugira indwi,Imana yanonosoye ibikorwa vyayo yakoze mu kurema, niko no ku munsi w’indwi, n’ukuvuga ku munsi wa mbere ukurikirana n’isabato(samedi mu gifaransa), Imana yanonosoye igikorwa cayo co gucungura isi biciye mw’izuka rya Yesu.(Soma Matayo 28:1-6, Mariko 16:1-6, Luka 24:1-6, Yohana 20:1).
Rero, bivuye mu kilatini ca gikirisitu, ijambo « Dies Dominicus » ryarahindutse ribanza guca mu gifaransa ca kera, riba « diemenche », imbere y’uko rihinduka « Dimanche » mu gifaransa c’ubu, risigura mu Kirundi « Kuwa Mungu ».
Hejuru y’uko ari umunsi w’ikiruhuko, minsi yose kuwa Mungu, twategerezwa guhora twibuka intsinzi ya Yesu.
Kuwa Mungu, twari dukwiriye guhora twibuka ko urupfu rwatsinzwe, ko rutakidufiseko ubushobozi; ko twakuweko itegeko ryo gutanga ibimazi kugira tubabarirwe ibicumuro vyacu, kuko Yesu yabaye ikimazi kimwe kizima kandi c’intahava(Soma Abaheburayo 10:10-12), kandi ko tutakigengwa n’amategeko, ko tugengwa n’ubuntu bg’Imana mw’isezerano rishasha ryabereye ku musaraba.
IGISABISHO:
Uhoraho Mwami Mana yacu, duhe guhora duha agaciro intsinzi yawe muvyo dukora vyose.
Ni mw’izina ridasanzwe de ry’umwana wawe Yesu Kristo tubisavye, Amen.
Intumwa y’Imana Jean-Claude SINDAYIGAYA