« Ndunamurira amaso yanje ku misozi: Ugutabarwa kwanje kuzova hehe? Ugutabarwa kwanje kuva k’Uhoraho Yaremye ijuru n’isi. » (Zaburi 121:1-2)
Hari imvugo abantu bakunda kuvuga ngo: «Imana ifasha uwifashije.»
Ariko iyo mvugo ntiva muri Bibiliya kandi nta kuri kuyirimwo.
Ijambo ry’Imana ritwigisha ko ugutabarwa n’Imana kudaterwa n’uko twishoboye, ariko ko guterwa n’uko twizigira ko ugutabarwa guturuka ku Mana, tukishira mu maboko yayo.
Yesu yavuze ati:
«…kukw ataco mubasha gukora mutamfise.» (Yohana 15:5)
Imana ntidusaba kubanza kwigeragereza twenyene ngo ize kudutabara ar’uko twananiwe. Yifuza ko duhera kuri Yo, mu kwicisha bugufi no kuyizigira. Dawidi yavuze ati:
«Ugutabarwa kwanje kuva k’Uhoraho.»
Ugutabarwa n’Imana kwigaragaza iyo turi mu ntege nke. Paulo yaravuze ati:
«Ubushobozi bganje buhingurirwa mu ntege nke. Nuko cane-cane nzonezererwa kwirata intege nke zanje, ng’ubushobozi bga Kristo bunzeko.» (2 Ab’iKorinto 12:9)
Iyo twemeye ko ataco twishoboje ni ho Imana ica igaragaza ubushobozi bwayo.
«Ukorere Uhoraho urugendo rwawe rwose, Abe ari we wishimira, na we azobishitsa.» (Zaburi 37:5)
Imana ihezagira utwigoro twacu iyo dufatiye ku kwizera no ku kwumvira.
Imana ntifasha uwifashije, ariko ifasha uwuyizigiye akayitabaza, avuga ati: « Mwami, ndagukeneye. »
IGISABISHO:
Mwami Mana yanje, ndemeje ko ntaco nishoboje ntarikumwe nawe.
Ndahevye kwizera ubushobozi bwanje, nishize munsi y’ububasha n’ubushobozi vyawe.
Nyobora, unkomeze, ukore mu buzima bwanje.
Amen.
Intumwa Dr Jean-Claude SINDAYIGAYA