« Nduburira amaso yanjye ku misozi,Gutabarwa kwanjye kuzava he? Gutabarwa kwanjye kuva ku Uwiteka, Waremye ijuru n’isi. » (Zaburi 121:1-2)
Abantu benshi baravuga bati: «Imana ifasha uwifashije.»
Ariko ibyo si byo Bibiliya ivuga kandi nta kuri kubirimo.
Ijambo ry’Imana ritwigisha ko ubutabazi bw’Imana buturuka ku kwiringira Imana, budaturuka ku kumva twihagije no kwishingikiriza ku mbaraga zacu.
Yesu yavuze ati:
«…kuko ari nta cyo mubasha gukora mutamfite.» (Yohana 15:5)
Imana ntidusaba kubanza kwikorera byose ngo ari bwo idutabara. Ahubwo ishaka ko duhera kuri Yo, dukomeza kuyiringira no kuyumvira. Umwanditsi wa Zaburi yaravuze ati:
«Gutabarwa kwanjye kuva ku Uwiteka…»
Imana yigaragariza mu ntege nke zacu. Pawulo yaranditse ati :
«Aho intege nke ziri ari ho imbaraga zanjye zuzura.” Nuko nzanezerwa cyane kwirata intege nke zanjye, ngo imbaraga za Kristo zinzeho.» (2 Abakorinto 12:9)
Iyo umuntu yemeye ko adashoboye, ni ho Imana yerekana imbaraga zayo.
«Ikoreze Uwiteka urugendo rwawe rwose,Abe ari we wiringira na we azabisohoza.» (Zaburi 37:5)
Imana ifasha abakorera mu kwizera no mu kuyubaha.
Imana ntifasha abishingikiriza kuri bo ubwabo, ahubwo abashyira ibyabo mu biganza byayo.
ISENGESHO:
Mwami Mana yanjye,
ndemera ko nta cyo nishoboza ntari kumwe nawe.
Nshyize iby’ubuzima bwanjye mu biganza byawe, unyobore kandi unkomereze mu bushake bwawe.
Amen.
Intumwa Dr Jean-Claude SINDAYIGAYA