Bibiliya iradusaba guhora twiteguye gutanga umusanzu mu bikorwa by’Umwami.
« Haza umuntu wese utewe umwete n’umutima we, uwemejwe na wo wese, bazana amaturo batura Uwiteka yo kuremesha rya hema ry’ibonaniro, n’ayo gukoresha imirimo yaryo yose n’ayo kuremesha ya myenda yejejwe. »(Kuva 35:21)
Amategeko agenga amaturo yo kubaka ihema ry’ibonaniro yari asobanutse: Abaterwa umwete n’umutima wabo gusa bakanemezwa nawo, nibo bonyine bazanaga amaturo.
Kandi, uretse ko ayo maturo yatangwa ku bushake, umuntu wese yatanga icyo afite.(Soma Kuva 35:22-28)
« Abisirayeli bazana amaturo ava mu rukundo bayatura Uwiteka, aturwa n’umugabo wese n’umugore wese wemejwe n’umutima we, kuzana ibyo kuremesha ibyo Imana yategetse Mose kurema byose. »(Kuva 35:29)
Amatorero yacu atandukanye afite umuhamagaro w’umurimo w’Imana, niyo mpamvu buri mukristo mwiza agomba gutwarwa n’ubushake bwo gutanga umusanzu we mu kubaka itorero rye.
Usanga, bamwe babikora kugirango biyerekane cyangwa bemerwe mw’itorero, abandi bakabikora kubera ubwoba cyangwa igitutu cy’abashumba b’itorero, ariko twe tugomba kubikora tubyemejwe n’umutima wacu.
Reka imitima yacu ihore yiteguye gutanga umusanzu uwo ari wo wose mu kubaka itorero.
ISENGESHO:
Data wa twese uri mu ijuru, duhe guhora twiteguye gufasha kubaka itorero ryacu.
Ni mu izina ry’agaciro ry’umwana wawe Yesu kristo tubisabye, Amen.
THE LION OF JUDAH MINISTRY IN THE WORLD©
thelionofjudahmission@gmail.com
☎: + 250 730 900 900
KIGALI – RWANDA