«Dushingura impari n’igishizwe hejuru cose, kihashiriwe kurwanya ukumenya Imana, dufata mpiri ivyiyumvirwa mu mitima vyose, ngo tubigomorere Kristo.» (2 Ab’i Korinto 10:5)
Hari impari n’ivyiyumviro bishobora kuduhagurukira: amajambo avugwa kugira ngo aduce intege, imigambi itegurwa kugira ngo itugirire nabi, imanza z’abantu zitari iz’ukuri, urwanko, canke imigambi igamije kutugusha.
Ariko ntiduhamagarirwa kwakira gusa ikintu cose kiza kuturwanya.
Muri Kristo, twahawe ububasha bwo gushingura impari zose n’ivyiyumviro vyose binyuranye n’ukuri kw’Imana, kwanka amajambo atubwira ko tuzotsindwa, no guhagarara dushikamye ku vyo Imana ivuga ku buzima bwacu.
Iyo tumenye ko hari abantu batwanka, batwiyamiriza canke bipfuza ko tugwa, inyishu yacu ntikwiye kuba urwanko. Tubashira mu minwe y’Imana. Tubasengera kugira ngo ivyiyumviro vyabo bihinduke, imitima yabo ikorweko n’Imana, kandi imigambi yabo ihinduke.
Kuko ntidushobora gutegeka ivyiyumviro vy’abandi, ariko turashobora gushingura ikintu cose gihaguruka kurwanya ukuri kw’Imana, tukarwanya ikibi kandi tukizera ko Imana ishobora guhindura n’umuntu aturwanya ikamugira igikoresho c’amahoro.
Ntureke rero ngo ivyiyumviro vy’abantu bibe ari vyo bigenga ubuzima bwawe.
Ivyo Imana yagambiriye kuri wewe ntibishobora guteshwa agaciro n’ivyo umuntu yiyumvira canke ategura kukugirira.
Dushingure impari.
Dufate mpiri ivyiyumviro vyose.
Tubigomorere Kristo.
Maze Imana ibe ari Yo ikora ku mitima y’abantu.
«Imana iri mu ruhande rwacu, ni nde azoturwanya?»(Abaroma 8:31)
Shalom!
Intumwa Dr Jean-Claude SINDAYIGAYA