«Uhoraho, wokwama wibuka ibigabitanyo,
Bgirukiro, ni nde yohava akazohagarara adatsinzwe?» (Zaburi 130:3)
Hari ukuri abantu bakunda kwibagira bitagoranye:
Dukunda guhabwa ubuntu… ariko tukihutira gucira abandi urubanza.
Iyo twaguye, dushaka ko batwumva, ariko iyo abandi baguye natwe biratugora kubumva.
Dusaba Imana kutwihanganira ku makosa yacu, ariko rimwe na rimwe natwe tukanka kwihanganira abandi.
Ariko Bibiliya iratwibutsa ukuri gukomeye:
Iyo Imana iba idufata nk’uko natwe rimwe na rimwe dufata abandi, nta n’umwe muri twebge aba yoshobora guhagarara imbere yayo.
Twebge duca urubanza dukurikije ivyo tubona inyuma.
Imana yo ica urubanza mu kuri.
Twebge twihutira gucira abandi urubanza.
Imana yo, irihangana cane.
Twebge tubona ibikorwa vyo hanze gusa.
Ariko Imana ibona n’ibikomere vyihishije, intambara zo mu mutima, intege nke n’amarira abantu bahisha.
Ni kangahe twababariwe tutazi uburemere bw’imbabazi twahawe?
Ni kangahe Imana yatwihanganiye kandi twari dukwiriye guhanwa?
Ubuntu bw’Imana ntibusobanura ko icaha cemewe.
Ahubwo bugaragaza ko Imana ibanza gushaka gukiza imbere yo kurandura, kuvyura umuntu imbere yo kumureka, no guhamagarira umuntu kwihana imbere yo kumucira urubanza.
Ni co gituma Yesu yavuze ati:
«Kuko, uko muhinyura abandi, ari ko muzohinyurwa namwe; kand’ ingero mugeramwo muzoyigererwa namwe.» (Matayo 7:2)
Umuntu asobanukiwe vy’ukuri ubuntu bw’Imana aricisha bugufi.
Ntaba acibona nk’uwuri hejuru y’abandi.
Yibuka ko na we abeshwaho n’imbabazi adakwiriye.
Ivyo ntibisobanura ko dukwiye kwirengagiza ikibi.
Ahubwo bisobanura ko dukwiye kuraba abandi twibuka ko natwe buri munsi dukeneye ukwihanganirwa n’Imana.
Mbere yo gucira umuntu urubanza, twame twibuka incuro nyinshi Imana itaduciriye urubanza.
Iyo hataba ubuntu bw’Imana, twese tuba twararanduwe.
IGISABISHO:
Mwami, ndagushimira ubuntu bgawe no kunyihanganira kwawe.
Nyigisha kudacira abandi urubanza nabi, ahubwo ngendere mu rukundo no mu mbabazi.
Mw’izina rya Yesu Kristo. Amen.
Intumwa Dr Jean-Claude SINDAYIGAYA