Muri Bibiliya dusangamo inkuru idufasha kumva uburyo amarangamutima n’imimerere y’umutima bishobora gutuma twibagirwa ko turi abana b’Imana.
Muri Luka 15, Yesu yavuze inkuru y’umugabo wari ufite abahungu babiri.
Umwana muto yasabye umugabane w’umurage we, ava mu rugo ajya kubaho mu busambanyi no mu byaha.
Ariko amaze gutakaza byose, yagarutse kwa se, maze se amwakirana ibyishimo byinshi ndetse amutegurira ibirori.
Umuhungu mukuru abonye uko se yishimiye kugaruka kwa murumuna we wari warazimiye, yagize ishyari maze abwira se ati:
“Maze imyaka myinshi ngukorera…” (Luka 15:29)
Kubera ishyari, yibagiwe ko yari umuhungu n’umuragwa. Yitekerezaga nk’umugaragu gusa.
Ni ko bimeze no kuri bamwe mu bana b’Imana: bibagirwa ko ari abana bayo maze bakabaho nk’abagaragu, kandi ari abaragwa b’amasezerano y’Imana.
Nyamara Imana “yagambiriye kera ku bw’urukundo rwayo ko duhinduka abana bayo, tubiheshejwe na Yesu Kristo ku bw’ineza y’ubushake bwayo.” (Abefeso 1:5)
Kandi Bibiliya iravuga iti:
“Umwuka w’Imana ubwe ahamanya n’umwuka wacu yuko turi abana b’Imana.” (Abaroma 8:16)
Ariko hari amarangamutima menshi ashobora gutuma twibagirwa abo turi bo mu Mana.
Ishyari
Ishyari rituma tureba imigisha y’abandi aho kureba Imana. Rituma twumva ko tudafite agaciro cyangwa ko Imana yatwibagiwe.
Ubwoba
Ubwoba buraduparaliza, bugatuma tubaho nk’abacakara: gutinya kwangwa, gutsindwa cyangwa ejo hazaza. Butuma twibagirwa ko Imana ari Data wa twese.
“Kuko Imana itaduhaye umwuka w’ubwoba, ahubwo yaduhaye uw’imbaraga n’urukundo no kwirinda.” (2 Timoteyo 1:7)
Andi marangamutima mabi ni aya:
– Isoni
Zituma twumva tutagikwiriye kwitwa abana b’Imana.
– Kwicira urubanza bikabije
Bituma duhunga Imana aho kuyigarukaho nk’umwana ugarukira se.
– Ubwibone
Butuma tubaho tudakeneye Imana.
– Kwangwa
Bituma twumva ko niba abantu badutaye, Imana nayo yadutaye.
– Gucika intege
Bituma twibagirwa amasezerano n’umurage Imana yaduteguriye.
– Kwigereranya n’abandi
Bituma dusuzugura ibyo Imana yashyize muri twe.
– Umujinya n’agahinda byimbitse
Byangiza ubusabane bwacu n’Imana.
– Gushidikanya
Bituma dushidikanya ku rukundo n’ubudahemuka bw’Imana.
– Gukunda iby’isi
Bituma twibagirwa ko turi abantu b’ubwami bw’Imana.
Akenshi:
– Ishyari rituma tureba abandi;
– Ubwoba bugatuma tureba ibibazo;
– ariko Kwizera gutuma tureba Imana.
Ukuri kwa Bibiliya kuguma ari kwa kundi:
“Nimurebe urukundo ruhebuje Data wa twese yadukunze, rwatumye twitwa abana b’Imana kandi ni ko turi.” (1 Yohana 3:1)
Intambara yo mu mwuka akenshi itangirira aho: kudutera kwibagirwa uwo turi we mu Mana.
ISENGESHO
Mwami, dufashe kutazigera twibagirwa ko turi abana bawe. Kiza imitima yacu ishyari, ubwoba, gushidikanya n’ibindi byose bitwigiza kure yawe. Twigishe kubaho mu kwizera no mu byiringiro by’urukundo rwawe.
Mu izina rya Yesu Kristo. Amen.
Intumwa Dr. Jean-Claude SINDAYIGAYA