« Kuko mutahawe umwuka w’ububata ubasubiza mu bwoba, ahubwo mwahawe umwuka ubahindura abana b’Imana… » (Abaroma 8:15)
Inkuru ya Hagari ni imwe mu nkuru zikora ku mutima cyane dusanga muri Bibiliya.
Kubera ko yari umuja wa Sara, yakoreshejwe nk’uburyo bwo gukemura ikibazo kitari icye. Sara na Aburahamu ni bo bamufatiye ibyemezo birebana n’ubuzima bwe.
« Sarayi ni ko kubwira Abramu, ati «Nyamuneka, ndabigusabye, dore Uhoraho yambujije kubyara. Sanga uriya muja wanjye, none ahari nazamubonaho umwana.» Abramu yemera iyo nama ya Sarayi. » (Intangiriro 16:2)
Umubiri we, ahazaza he n’ubuzima bwe byashyizwe mu gukorera inyungu za Aburahamu na Sara.
Amaze gusama inda, amakimbirane yaravutse. Uwari warabaye ingirakamaro yaje gufatwa nabi, arangwa, maze ahitamo guhungira mu butayu.
« Sarayi aramutoteza, undi arahunga, aramubisa. » (Itangiriro 16:6)
Iyi nkuru iratuburira ku bijyanye n’umwuka w’ubucakara.
Umwuka w’ubucakara utuma umuntu abaho kugira ngo ashimishe abandi gusa, rimwe na rimwe akabyigura agaciro ke, amahoro ye ndetse n’umubano afitanye n’Imana.
Umuntu utegekwa n’uyu mwuka agira ikibazo cyo kuvuga ati OYA, yemera ibidakwiye kwemerwa, akihanganira akarengane acecetse, kandi akenshi agakoreshwa hanyuma akajugunywa igihe amaze kuba ingirakamaro.
Muri iki gihe turimo, hari abantu begera abandi bagamije inyungu zabo bwite gusa. Barashuka, bagakoresha nabi abandi, bakabakandamiza kandi bakungukira ku bugwaneza, intege nke cyangwa icyizere by’abandi.
Igihe cyose babona icyo bashaka, bakomeza kuguma hafi. Ariko bamaze kugera ku migambi yabo, ntibatinda guta abo bakoresheje.
Abizera bakwiye guhora bari maso.
Kuba mwiza ntibivuze kwemera gukoreshwa uko bishakiye cyangwa gufatwa uko abantu babyifuza. Urukundo ntirusobanura kwemera gukomeza gukinishwa n’abandi. Kubabarira ntibivuze guhora wisubiza mu maboko y’abaguhutaza.
Imana iduhamagarira gukorera abandi, ariko ntidukwiriye guhinduka abacakara b’ibyifuzo by’ubwikunde by’abantu.
Bibiliya itwigisha ko Yesu Kristo yaje kubohora imbohe.
Muri Kristo, ntabwo turi ibikoresho abantu bakoresha ku nyungu zabo. Turi abana b’Imana, baremwe mu ishusho yayo, bacunguwe igiciro gikomeye kandi bahamagariwe kugendera mu mudendezo w’Umwuka.
Niba hari imibanire ikujyana kure y’Imana, ikakwambura amahoro, igatesha agaciro ubuzima bwawe cyangwa igahora igukoresha itakwubaha cyangwa ngo igushimire, saba Umwami aguhe ubwenge bwo gushyiraho imbibi.
Ntutinye kwitandukanya n’abashaka kugukandamiza cyangwa kugukoresha ku nyungu zabo.
Nk’uko byagendekeye Hagari mu butayu, ujye wibuka ko Imana ibona imibabaro yawe.
Aho abantu bakubona nk’igikoresho gusa, Imana ikubona nk’umuntu w’agaciro. Aho abantu bagukoresha, Imana iragukunda. Aho abantu bakwanga, Imana iguhamagara mu izina ryawe.
Uyu munsi, hakana umwuka w’ububata. Reka gutinya abantu. Wange gukinishwa n’abandi. Gendera mu mudendezo Imana yaguhaye, kandi wibuke ko utahawe umwuka w’ububata, ahubwo wakiriye Umwuka uguhindura umwana w’Imana.
ISENGESHO:
Data wo mu ijuru, nkiza umwuka wose w’ububata n’uburyo bwose bwo gukinishwa n’abandi.
Mpa ubwenge bwo kumenya abashaka kunkoresha ku nyungu zabo bwite.
Nyigisha kugendera mu mudendezo, mu gaciro no mu kimenyetso cy’umwana w’Imana wampaye muri Yesu Kristo.
Umwuka wawe abe ari we unyobora kandi undinda iminsi yose.
Amen.
Intumwa Dr Jean-Claude SINDAYIGAYA